Май Ван Фан

Пераклад Рагнеда МАЛАХОЎСКАГА

Рагнед Малахоўскі

Трымаю цябе ў роце

Я заўсёды ўяўляю і веру,

Што трымаю цябе ў роце –

Там, дзе ніколі няма войнаў,

хвароб,

Плётак і намоў, пастак і падману,

Каб на тваім шляху

Больш не было вострых шыпоў.

Я пабудую сцяну,

Каб бушуючым тайфунам

Перагарадзіць шлях да цябе.

Ты лёгенька штурхаешся плячыма,

Упіраешся грудной клеткай,

Пальцамі ног у мае шчокі.

Балбочучы і ціхенька напяваючы,

Нязмушана дазваляеш

Майму языку і зубам

Дакранацца да твайго цела.

У роце ў мяне ты абароненая

І можаш быць спакойнай.

Я – рыба, чый рот перапоўнены

Святлом месяца.

Я пакідаю сваю зграю

І накіроўваюся ў бушуючае мора.